بلاش تتفرج على " يوسف الصديق " .. وتعالى تابع " يوسف الأحلام "

بسم الله الرحمن الرحيم

أخباركم إيه ؟؟

تعالوا أحكيلكوا حكاية بسيطة حصلت مع شخص وهو بيحكيهالنا وببقول ....
واحد صاحبي بيسألني سؤال لولبي : قالي تعرف إسم سيدنا يوسف الحقيقي إيه ؟؟
قولت له : هو فيه سيدنا يوسف الحقيقي وسيدنا يوسف المزور ؟؟
قال : لا ... أنا أقصد الإسم ... الإسم الحقيقي لسيدنا يوسف ؟
قولت : أكيدد يوسف
قال . لا
- إمال إسمه إيه ؟
- يوزرسيف
- إيه ...مين ؟
- يوزر سيييييييييف
- جبتها منين دي ؟
- من المسلسل .....
- آه المسلسل ... بص يا بن الحلال .. هل بتوع المسلسل يعرفوا سيدنا يوسف أكتر من أخواتو
- قصدك إيه يعني
- جاوبني بس ... يعرفوه أكتر من أخواتو ؟
- لا طبعاً ... هما مش يعرفوه أصلا
- طيب ... يعرفوه أكتر من أبوه ؟"؟؟
- لا طبعاً ... أبوه أكتر
- طب معلش ... يعرفوه أكتر من ربه .. أكتر من الله
- أكيد لأ
- طيب يا باشا .. ربنا قال عن نبي الله يوسف إن إسمه يوسف ولما نادى عليه قاله ."" يوسف أعرض عن هذا وإستغفري لذنبك إنك كنتي من الخاطئين " ... ولما إتكلم عنه " لقد كان في يوسف وأخوته آيات للسائلين " ..... ولما أخوته تكلموا عنه قالوا " إذ قالوا ليوسف وأخوه أحب إلى أبينا منا ونحن عصبة " .. ولما أبوه - سيدنا يعقوب عليه السلام - تكلم عنه قال " إني لأجد ريح يوسف لولا أن تفندون " .... معقوله بقا أنا أكذب دول وأصدقك إنتا والمسلسل

مسلسل يوسف الصديق ... حاجة إنتشرت بين المسلمين وفتحت أبواب النقاش على حاجات كتير زي جواز تجسيد الأنبياء والصالحين .... وكل واحد أدلى بدلوه وأنا مش عاوز أتكلم في الموضوع ده بس هقولك إن من شروط التمثيل الحلال اللي وضعها العلامة إبن عثيمين : ألا يكون فيه تجسيد للأنبياء والصحابة والصالحين ... ولا تجسيد للفسقة والكافرين .... !!! ومش ده موضوعنا

المسلسل بيتعرض على إحدى القنوات المعروفة بإحترامها اللي مش موجود ... وعامل شعبيه كويسة وأنا شايف إن سبب الشعبية دي إن الناس عاوزة تعرف دينها و تسمع قصص من القرآن بس من غير ما تتعب نفسها .. علشان كده حبوا يعرفوا الحكاية من المسلسل ويستسهلوا .... طبعاً المسلسل إيرااااني شيعي ..!!

طب يا سيدي ده " يوسف الصديق " عرفنا إنك تقصد المسلسل ...
تقصد إيه بــ " يوسف الأحلام "
أقولك يا أستاذي ... بس بعد ما تصلي على نبي الله محمد ونبي الله يوسف ... صلى الله عليه وسلم

يوسف الأحلام ... سلسلة قدمها الشيخ محمود المصري من كام سنة في رمضان .. بيحكي فيها قصة سيدنا يوسف من القرآن والسنة الصحيحة ...بأسلوب سهل وبسيط وميسر وطبعاً كلنا عارفين أسلوب الشيخ الرائع
أنا قولت ...طالما قصة سيدنا يوسف الناس حبتها وعايزة تعرفها ... يبقى تعرفها من أصلها .. من القرآن وصحيح السنة ...
وهعملك مقارنة بسيطة بين الإتنين " يوسف الصديق " .. " يوسف الأحلام "

أولاً يوسف الصديق "
- النوع : مسلسل ( طبعاً التمثيل حرام علشان الستات اللي فيه والمزيكا و تجسيد الأنبياء )
- البلد : إيران (( أصل الشيعة ... الشيعة اللي بيسبوا الصحابة ويلعنوا أمي وأمك ... السيدة عائشة رضى الله عنها وصلى الله على زوجها )
- المصدر : بالرغم من إني مشفتش المسلسل .. لكن أكيد هيبقى فيه غلطات تاريخية تغالط الدين .. طبعاً علشان يعملوا حبكة .. يبقى أصل القصة مش من عندنا
- الشخصيات : ناس مش نعرفهم ومنعرفش الممثل ده عمل أدوار إيه قبل كده
- المعلومات الموجودة : -----------

ثانياً : يوسف الأحلام
- النوع : سلسلة دعوية رائعة قدمها الشيخ محمود المصري بأسلوب سهل ورائع
- البلد : مصري .. والشيخ سلفي سني متبع للنبي صلى الله عليه
- المصدر : النبعان الصافيان ... القرآن وصحيح السنة
الأشخاص : داعية فاضل صاحب وجه بشوش وضاحك
- المعلومات : كلها موثقة ومراجعة ومطابقة لصحيح السنة على صاحبها أفضل الصلاة والسلام ..

ها قررت ... هتشوف أنهي وتسيب مين

طب لو مش قررت .. جرب ومش هتخسر ... وإختار يا سيدي

سام ممكن سؤال هو ممكن الواحد يتابعه على انه مسلسل عادي ولا لا وبعدين انا عاوز اعرفك على حاجه لما نزل الوحي على سيدنا يوسف مكنش الاسلام كان لسه بيعرفهم ان في رب واحد احد وكان لسه بيدعوهم لعباده الله وبينهيهم عن عباده اي اله اخر زي الاصنام وكده هو كان بيقول للناس ان في رب واحد احد هو الي خالق الكون ده وهو الي بيستجيب لدعائي وانا ملحظتش في المسلسل اي غلطه عشان اختلاف الشيعه والسنه مع بعض في حجات تانيه خالص مش قصص زمان الي كان لسه مجاش فيها لا الاسلام ولا المسيحيه ولا اليهوديه وبعدين الشيعه دول برده بيامنو بالقران زي مانتي عارفه بس في عندهم مشاكل في الاعتراف بنزول الوحي على سيدنا محمد صلى الله عيه وسلم وانتي عارفه انهم بيقولو انه كان نازل على سيدنا علي عليه السلام وبعض التخاريف زي زواج المتعه وغيره وغيره اه وفي حاجه كمان انتي قولتي في الموضوع كلمه كده (بعد ماتصلي على نبي الله محمد ونبي الله يوسف)اولا احنا بنصلي على نبي واحد محمد صلى الله عليه وسلم وثانيا اي نبي اخر بنقول عليه(عليه السلام) لان ربنا كرم سيدنا محمد صلى الله عليه وسلم بذكر اسمه بجوار اسم ربه وميرسي على موضوعك ويسلمووووووووووووو

المسلسل حراااااااااااااااااااااااااااااااام وحرام مشاهدته بإجماع علماء المسلمين القدامى والمعاصرين ولجنة كبار العلماء ومجمع البحوث ... كلهم أجمعوا على عدم تجسيد الأنبياء والملائكة ... والمسلسل فيه جبريل ويوسف ويعقوب والأسباط ....

أفتى الدكتور سالم عبدالجليل، وكيل وزارة الأوقاف، بتحريم مشاهدة مسلسل «يوسف الصديق» باعتباره يجسد حياة أحد أنبياء الله، معتبرا أن من يخالف ذلك ويشاهد العمل فهو بذلك يعصى الله ورسوله.

وقال: «كل مسلم يشاهد هذا العمل فهو يرتكب معصية»، وطالب كل المسلمين بمقاطعة المسلسل وعدم مشاهدته لأنه لم يراع حرمة الأنبياء بتجسيد شخصية النبى يوسف على الشاشة.

وأضاف عبدالجليل: هناك اجماع من علماء الدين على عدم جواز تجسيد الملائكة والأنبياء بأى حال من الأحوال فى أى عمل درامى أو فنى.. وانطلاقا من هذا المبدأ فلا يجوز متابعة مسلسل «يوسف الصديق» أو غيره من الأعمال التى تجسد أحد الانبياء.. فهذا حرام شرعا وكل من يشاهد هذا العمل فهو يرتكب معصية بلا شك.

وقلل وكيل وزارة الأوقاف من أهمية حصول صناع المسلسل على فتاوى من مرجعيات شيعية تبيح تجسيد الأنبياء، وقال: لا يعنى أبدا إذا ارتكب مسلم معصية أن نسامحه لأنه مسلم.. وما حدث هو ارتكاب معصية فى نظرنا نحن أهل السنة ولا يعفى العمل كونه صادرا عن ايران صاحبة المذهب الشيعى المختلف عن مذهبنا وليس كل ما هو صادر عن المرجعية الشيعية يتفق بالضرورة مع مرجعيتنا السنية.

ورفض عبدالجليل الربط بين تلك الفتوى وعرض المسلسل على فضائية مصرية، موضحا أنه من الواجب على أى وسيلة إعلامية أن تراجع المؤسسات الدينية إذا كانت تنوى التصدى لعرض هذه النوعية من الأعمال حتى ترفع الحرج عنها..

أما فيما يتعلق بفتوى التحريم والضرر الذى سيقع على المحطة فأنا لم أتعرض للقناة ذاتها فى فتواى بل وجهتها بالأساس للمشاهد فهناك قنوات كثيرة تدعو للمذهب الشيعى ولم أتعرض لها فمن حق أصحابها أن يدعو لمذهبهم وأنا لا أصادر على حقهم ولكن واجب علىَّ كرجل سنى أن أحذر المسلمين من مشاهدتهم ومشاهدة هذه النوعية من الأعمال الدرامية.

وتابع قائلا: الخوف كل الخوف أن يتأثر بها أبناؤنا الصغار والشباب الذين لايزالون فى مرحلة النشء وتكوين خبراتهم الحياتية بأن يترسخ فى أذهانهم جواز هذه الأعمال التى يتجسد فيها الأنبياء من متابعتهم لها على الشاشة بشكل طبيعى ومتاح فلا أحد ينكر أبدا حقيقة تأثير العمل الفنى على شريحة كبيرة من المشاهدين وعلى كل حال الأمر فى يد المشاهد فهو وحده القادر على أن يتخذ قراره وفقا لرؤيته الخاصة إما بمتابعة العمل أو الابتعاد عنه.

ورفض وكيل وزارة الأوقاف اتهام علماء الدين بالوقوف ضد الابداع الفني، وقال: لسنا ضد الابداع بل بالعكس تماما فنحن مأمورون بالابداع بكل نواحى الحياة ولكن بما يتفق مع الاطار الشرعى لديننا الاسلامى ونحن نطالب باحترام أنبيائنا وعدم تجسيدهم على الشاشة وهذه مسألة خاصة جدا بالسنة بدليل أننا لم نعترض على مسلسل «الرسالة» الذى يتعرض للصحابة ولرسول الله محمد (صلى الله عليه وسلم) لأن العمل احترم نبينا محمد واستعان بمن يحكى عنه.

وعن ارتباط هذه الفتوى بمسلسل «يوسف الصديق» رغم ان القناة ذاتها عرضت العام الماضى مسلسل «مريم العذراء» قال: الفتوى صدرت لأن هناك من بادر بالسؤال والبحث عنها وفى كل الأحوال نحن جميعا نرفض كل الأعمال التى تجسد الأنبياء جميعهم بمن فيه المسيح وأمه بالطبع السيدة مريم.. فنحن نتعامل مع الأنبياء جميعهم كنبى واحد ولا يجوز أن نطبقه على سيدنا محمد وبالتالى لا يجوز أبدا أن نطبقه على نبى غيره.

بالنسبة بقي لنقطة اننا نصلي علي سيدنا يوسف ورسول الله عليهما افضل الصلاة والسلام فلو مرة لاحظت كنت هتلاقي شيخ اعتقد محمد حسان مثلا في موقف بيذكر اسم نبي وبعدين يقول عليه وعلي نبينا افضل الصلاة والسلام

ويسلمو ع المرور سلطان بس يا ريت بجد نبطل نشوفه بعد ما عرفنا كل ده
ربنا يهدينا ويهدي الجميع يا رب

تسلم ايدك وجزاك الله خير

اكيد بعد كل الاثباتات دي مش عاتفرج عليه تاني وربنا يجزاكي كل خير وشكرا على التنبيه السريع ده ميرسي بجد يا سام

» حين تغيب شمس الأحلام
» بلاش دي وخليها دي
» للآنسااااااااات ... ارجوكن بلاش فضاااااااايح
» تابع اخبار النجوم والفنانين اول بااول ؟؟
» مامعنى الصديق؟